Shoqata e Prodhuesve të Qumështit të Kosovës (SHPQK) organizoi me sukses Konferencën e III-të, duke mbledhur përfaqësues institucionalë, partnerë ndërkombëtarë, ekspertë, akademikë dhe fermerë për të diskutuar sfidat dhe perspektivat e zhvillimit të sektorit të qumështit.
Kryetari i SHPQK-së, Naser Bajraktari, theksoi rolin kyç të fermerëve në zhvillimin e sektorit dhe rëndësinë e bashkëpunimit ndërinstitucional, duke falënderuar donatorin We Effect, Fondacionin AgroDev dhe partnerët ndërkombëtarë për mbështetjen e vazhdueshme.
Përfaqësuesit institucionalë dhe partnerët vlerësuan konferencën si një platformë të rëndësishme për dialog dhe koordinim ndërmjet politikave, dijes dhe praktikës, me fokus në forcimin e kapaciteteve të fermerëve dhe zhvillimin e qëndrueshëm të sektorit.
Tema e konferencës, “Biosiguria, ndryshimet klimatike dhe perspektiva e zhvillimit të sektorit të qumështit”, u trajtua përmes prezantimeve nga ekspertë të fushës, të cilët ndanë njohuri praktike dhe rekomandime për përmirësimin e biosigurisë në ferma, përshtatjen ndaj ndryshimeve klimatike dhe rritjen e cilësisë së qumështit.
Konferenca shërbeu si një hapësirë për shkëmbim përvojash, diskutim profesional dhe ndërtim të një vizioni të përbashkët për zhvillimin afatgjatë të sektorit të qumështit në Kosovë.
